ഹെപ്പറ്റൈറ്റിസ് ബി രോഗവും വാക്സിനേഷനും

ഹെപ്പറ്റൈറ്റിസ് ബി എന്നത് ഹെപ്പറ്റൈറ്റിസ് ബി വൈറസ് മൂലമുണ്ടാകുന്ന കരൾ അണുബാധയാണ്. ഇത് കരളിനെ ബാധിക്കുകയും നിശ്ചിത (ഹ്രസ്വകാല) കാലയളവിലേക്കുള്ളതോ അല്ലെങ്കിൽ വിട്ടുമാറാത്തതോ (ദീർഘകാല) ആയ രോഗത്തിന് കാരണമാകുകയും ചെയ്യും.

കുട്ടികളിൽ ദീർഘകാല അണുബാധ ഉണ്ടാകാനുള്ള സാധ്യത കൂടുതലാണ്.

ഹെപ്പറ്റൈറ്റിസ് ബി അണുബാധയുള്ള മുതിർന്നവരിൽ 2-6 ശതമാനം പേർക്ക് മാത്രമേ ദീർഘകാല രോഗത്തിന് അല്ലെങ്കിൽ അണുബാധയ്ക്ക് സാധ്യതയുള്ളൂ, ശിശുക്കൾക്കിടയിൽ ഈ സംഖ്യ 90% വരെയാകാം.

രോഗബാധിതരായ എല്ലാവർക്കും രോഗലക്ഷണങ്ങൾ അനുഭവപ്പെടില്ലെങ്കിലും, ചിലർക്ക് സിറോസിസ് (ഗുരുതരമായ കരൾ രോഗം), ലിവർ ക്യാൻസർ തുടങ്ങിയ അവസ്ഥകൾ നേരിടേണ്ടി വന്നേക്കാം, അത് മരണകാരണവുമായേക്കാം.

ഹെപ്പറ്റൈറ്റിസ് ബി ബാധിതരാകാനുള്ള സാധ്യത ജനനം മുതൽ ആരംഭിക്കുന്നു. സാധാരണയായി ഹെപ്പറ്റൈറ്റിസ് ബി ബാധിച്ചേക്കാവുന്ന ചില മാർഗങ്ങൾ ഇതാ:

• രോഗം ബാധിച്ച അമ്മയിൽ നിന്ന് കുട്ടിയിലേക്ക്, ജനനസമയത്ത് (പെരിനാറ്റൽ ട്രാൻസ്മിഷൻ)
• രോഗബാധിതനായ വ്യക്തിയുടെ രക്തവുമായി സമ്പർക്കം പുലർത്തുന്നത് വഴി
• രോഗബാധിതനായ ഒരു വ്യക്തിയുമായി ടൂത്ത് ബ്രഷുകൾ അല്ലെങ്കിൽ ബ്ലേഡുകൾ പോലുള്ള വസ്തുക്കൾ പങ്കുവയ്ക്കുന്നതിലൂടെ
• സൂചികൾ, സിറിഞ്ചുകൾ, അത്തരത്തിലുള്ള മറ്റു ഉപകരണങ്ങൾ പങ്കുവയ്ക്കുന്നതിലൂടെ
• രോഗബാധിതനായ ലൈംഗിക പങ്കാളിയിലൂടെ

മുലയൂട്ടൽ, ആലിംഗനം, ചുമ, തുമ്മൽ, കൈകൾ പിടിക്കുക, അല്ലെങ്കിൽ പാത്രങ്ങൾ, ഭക്ഷണം, വെള്ളം പങ്കുവയ്ക്കുക എന്നിവയിലൂടെ വൈറസ് പടരില്ല.

അണുബാധയുടെ ആദ്യ ദിവസങ്ങളിൽ, ഒരാൾക്ക് രോഗലക്ഷണങ്ങളൊന്നും അനുഭവപ്പെട്ടേക്കില്ല. നേരിയ രീതിയിലുള്ള രോഗാവസ്ഥയിൽ ഇനിപ്പറയുന്ന ലക്ഷണങ്ങൾ അനുഭവപ്പെടാം:

മഞ്ഞപ്പിത്തം (കണ്ണുകൾക്കും ചർമ്മത്തിനും മഞ്ഞ നിറം)

ചർദ്ദി

അടിവയർ വേദന

ഓക്കാനം (വയറ്റിൽ അസ്വ്സതത് തോന്നുകയോ ഛർദ്ദിക്കാൻ തോന്നുകയോ ചെയ്യുന്നു)

ക്ഷീണം (കടുത്ത തളർച്ച അല്ലെങ്കിൽ മടുപ്പ്)

കടും നിറത്തിലുള്ള മൂത്രം

ഈ ലക്ഷണങ്ങൾ ഏതാനും ആഴ്ചകളോളം നീണ്ടുനിൽക്കാം. ചില സന്ദർഭങ്ങളിൽ, കഠിനമായ ഹെപ്പറ്റൈറ്റിസ് ഉള്ള ആളുകൾക്ക് ഗുരുതരമായ കരൾ രോഗം ഉണ്ടായേക്കാം, ഇത് മരണകാരണവുമായേക്കാം.

ഹെപ്പറ്റൈറ്റിസ് ബി വാക്സിനേഷൻ ഷെഡ്യൂളുകൾ കണിശത കുറവുള്ളവയാണ്, ഇത് ഒന്നിലധികം ഓപ്ഷനുകൾ നൽകുന്നു.

ഇവയിൽ ഇനിപറയുന്നവ ഉൾപ്പെടുന്നു:

ജനനസമയത്ത്, 6 &14 ആഴ്ചകളിൽ

ജനനസമയത്ത്, 6 ആഴ്ചകൾ, 6 മാസങ്ങൾ

ജനനസമയത്ത്, 6 ആഴ്ചകൾ, 10 ആഴ്ചകൾ, 14 ആഴ്ചകൾ

ഹെപ്പറ്റൈറ്റിസ് ബി വാക്സിനുകൾ ഒറ്റയ്‌ക്കോ സംയോജിതമായോ ലഭ്യമാണ്. കുത്തിവയ്പ്പ് (വാക്സിനേഷൻ) എടുക്കാൻ സാധിക്കാതെ വരുകയാണെങ്കിൽ, ഹെപ്പറ്റൈറ്റിസ് ബിയ്‌ക്കുള്ള ക്യാച്ച്-അപ്പ് വാക്‌സിനേഷൻ ഒരു ഡോക്ടറുടെ ഉപദേശപ്രകാരം എടുക്കാവുന്നതാണ്.

കൂടുതൽ വിവരങ്ങൾക്കായി നിങ്ങളുടെ ഡോക്ടറുമായി ബന്ധപ്പെടുക

ഹെപ്പറ്റൈറ്റിസ് ബി വാക്സിനേഷനുമായി ബന്ധപ്പെട്ട ഏറ്റവും സാധാരണമായ ചില പ്രതികൂല ഫലങ്ങളിൽ ഇനിപറയുന്നവ ഉൾപ്പെടുന്നു, എന്നാൽ ഇവയിൽ മാത്രമായി പരിമിതപ്പെടുന്നില്ല:

• തലവേദന

• പനി

• ഇഞ്ചക്ഷൻ എടുത്ത ഭാഗത്ത് ചുവപ്പ് അല്ലെങ്കിൽ വീക്കം

പാർശ്വഫലങ്ങൾ സംബന്ധിച്ച കൂടുതൽ വിവരങ്ങൾക്ക്, ദയവായി നിങ്ങളുടെ ഡോക്ടറുടെ ഉപദേശം തേടുക.